PURANETHIHASANGAL

വിദ്യാദേവിയായ സരസ്വതിയെക്കുറിച്ചുള്ള  ഈ  ചെറിയ അദ്ധ്യായത്തിലൂടെ
പുരാണേതിഹാസങ്ങളിലൂടെ നമുക്കൊന്ന് സഞ്ചരിച്ചാലോ."അനുഗ്രഹിക്കുക
Part1.
മഹാസമുദ്രം  പോലെ വിശാലമായ ഭാരതീയ പുരാണങ്ങൾ
മുങ്ങിത്തപ്പി അതിൽനിന്നും മുത്തുകളും പവിഴവും മുങ്ങിയെടുത്തു
അവതരിപ്പിക്കാൻ ഒരു ശ്രമം. ഇതിൽ ഒരുപാടു തെറ്റുകുറ്റങ്ങൾ കണ്ടേക്കാം.
കാരണം പല പുരാണേതിഹാസങ്ങളിലും
 കഥാപാത്രങ്ങൾക്ക് വൈരുദ്ധ്യം കാണുന്നുണ്ട്.
 അറിയാവുന്ന ആർക്കും തിരുത്താം, തെറ്റുകൾ
ചൂണ്ടിക്കാണിക്കാം.
വിദ്യാദേവതയായ സരസ്വതിദേവിയിൽ നിന്നും
തുടങ്ങാം.
പ്രകൃതിയുടെ അഞ്ചു രൂപഭേദമായ  ദുർഗ്ഗ,
രാധ,ലക്ഷ്മി,സരസ്വതി, സാവിത്രി,എന്നീ പഞ്ചദേവിമാരിൽ
ഒന്നായ സരസ്വതി ദേവിയെ കുറിച്ചാവട്ടെ  ആദ്യ കഥ.
സരസ്വതിദേവി ബ്രഹ്മ്മാവിന്റെ  പുത്രിയാണ്. ദേവിയുടെ
 ജനനത്തെപ്പറ്റി ബ്രഹ്മാണ്ഡപുരാണത്തിൽ പറയുന്നതിങ്ങനെ:
പ്രജകളുടെ സൃഷ്ടി നടത്താനായി ബ്രഹ്മാവ്  ധ്യാനനിരതനായി
ഇരിക്കുന്ന സമയത്തു് ശാന്തമായ മനസ്സിൽ സത്വഗുണം വർദ്ധിച്ചു
വരുന്നതായി അനുഭവപ്പെട്ടു. തത്സമയം ഒരു പെൺകുട്ടി ഭൂജാതയായി
മുന്നിൽ വന്നു നിന്നു."അങ്ങയിൽ നിന്നും ജനിച്ചവളാണ് ഞാൻ. എന്റെ
 സ്ഥാനവും ജോലിയും  എന്തെന്ന് കല്പിച്ചാലും ". എന്ന് പെൺകുട്ടി
ബ്രഹ്മാവിനോട് പറഞ്ഞു. " ധന്യേ നിന്റെ പേര് സരസ്വതി എന്നാണ്.
 സകല ജീവജാലങ്ങളുടെയും നാവിന്റെ അഗ്രത്തിൽ നീ വസിക്കുക,
വിശേഷിച്ചും വിദ്വാന്മാരുടെ ജിഹ്വാഗ്രത്തിൽ  നീ നൃത്തം ചെയ്യുക.
ഒരു നദീരൂപത്തിൽ ഭൂമിയിലും നിവസിക്കണം. മൂന്നാമത് വേറൊരു
 രൂപം പൂണ്ട്‌ എന്നിലും വസിക്കുക. സരസ്വതി ദേവി പ്രസന്നയായി
ബ്രഹ്മാവിന്റെ നിയോഗം പാലിച്ചു .